ఏమి చూపే అది చిత్రాల మారాణి

ఏమి చూపే అది చిత్రాల మారాణి

సూటిగా నీ చూపు నాటింది తుమ్మ ముల్లోలే

గుండె గుబ గుబ లాడి ప్రాణం విల విల్లాడి

ఒడ్డున పడ్డ చాపోలె పోర్లాను

పూసంత నవ్వితేనే పున్నములు పూస్తే

బంతి పువ్వులాగా యిరగబడి నవ్వితే

ఏమయ్యిపోవాల ఏడేడు లోకాలు ??

ఏమి చూపే అది చిత్రాల మారాణి

గోగు పుల రైక గుత్తు పూలా చీర గుత్తంగా నువ్వు కట్టి

గట్టు ఎమ్మడి గున గునా నడుత్త ఉంటే

రెండు కళ్ళు సాలవు నీ వయ్యారాల జిలుగును చూడంగా

గడ కర్రలగా నిట్రాట నై పోతి

ఆకుల్లో కొమ్మల్లో నడిసేటి దారుల్లో

ఎలిగేటి సూరీడు రేకల్లో

కడాకు వెంట నడిసేటి నా నీడ లో సైతం నిన్నే సూత్తున్నాను

ఏమి చూపే అది చిత్రాల మారాణి

కొప్పులో చామంతి దిక్కు తెలియక రాలిపోయే

దండ కడియాల నీకాళ్లు నడిచిన నేలంతా

కదలక మెదలక ఒక్కచోటే ఉండిపోయే

నాకేసి సూత్తా నవ్వు ఇసిరేసి పోయావు

రేయంత దిగులు పగలంతా సెగలు

ఏమి చూపే అది చిత్రాల మారాణి

చూపులోనా చురకత్తి బాణాలు

నడక లోన నవ్వేటి జలపాతాలు

కలువ పూల కళ్ళు కాటుక భరిణో లే  
    
నడుములో నెలవంక కరిగి జారి పోయే

ఏటి వడ్డున ఉన్న కోవెల్లో కోనేరల్లె  

ఒక చోట ఉండలేను నీదరికి చేరలేను

ఎంట పడి తరిమేటి నీ చూపునాపలేను 

ఏమి చూపే అది చిత్రాల మారాణి

తెలియనే లేదు నేనంతో నాలో నువ్వెంతో

నీరసించి పోతున్న నీ అడుగులను నిలకడ చేసేంతవరకు తెలియనేలేదు నా భుజాల బలమెంతో

నీ నడుము చుట్టూ తా బిగియక ముందు తెలియనే లేదు నా చేతుల పొడవెంతో

నీ వేళ్ళ సందుల్లో ముడిపడ్డ నా వేళ్ళ మధ్య ఖాళీ ఎంతో తెలియనే లేదు

నాజుగ్గా నీ తల వాల్పుకు నోచుకున్న నా చాతీ కొలత వివరమే లేదు

నీ చిలిపి రహస్యాలు వెచ్చని ఉపిరి శ్వాస ల మధ్య పంచుకునేంతవరకు తెలియనే లేదు వినికిడి వివరమెంతో

విడి జారి పోతున్న నిన్ను ఒడిసి పట్టేంతవరకు తెలియనే లేదు నా పట్టుదలల పంతమెంతో

గుట్టు చప్పుడు కాకుండా మ్రోగే నా గుండె లోని  ప్రేమా వేశమెంతో

తెలియనే లేదు నేనంతో నాలో నువ్వెంతో

అల్లరి మావా

తుంటరి నా మావా తలపుల్లో మునిగి

తెప్ప రాక కోసం తిప్పలు పడతాంటే

కొంటె గాలి వచ్చి పయిట లాగేస్తాందే

ఏటి నీళ్ళ నడిగి బదులేమీ రాక

మొగము తిప్పుకొని తిక మకలు పడుతుంటే

వెన్నెల మారాజు వేడి మంటలతోటి వలపు సెగ రాజేసే

కదల లేని దండ కడియాల కాళ్ళు ముడివేసి కూర్చున్నా

రెప్పలార్ప లేని కళ్ళు సెగల నార్పలేక

చింతపడి కూర్చుంటే ...

మల్లెల దండ ముడవలేదని అలిగి అందాల నా కొప్పు అలిగి జారిపోయే ..

రాడేమి నా మురిపాల మావా

ఇంకా రాడేమి నా అల్లరి మావా ..

సిరిమువ్వల నా నువ్వు

సుమధుర భావాలను కనురెప్పల కుంచెలతో గుండెపై చిత్రిస్తావు
గుండె చప్పుడు లో ని గుబులును గుస గుసలుగా మర్చి నా చెవులకు వినిపిస్తావు  

చిరు నవ్వు ల చురకత్తి తో అనుక్షణం దాడి సాగిస్తావు 

వాడి నిట్టూర్పుల వేడి తో మంచులో సైతం సెగలు రగిలిస్తావు 

నీ కనుల  సెలయేటిలో పడిన ప్రతి సారి వేయి సార్లు జన్మిస్తాను 

నను దాటి నీ చూపు మరిలిన అనుక్షణం నేను లక్షసార్లు మరణిస్తాను 

పదహారేళ్ళ ప్రాయం

లేత అరచేతిలో పెట్టిన గోరింటాకు 

బుగ్గల్లో పండే వైనం 

చిలిపి కళ్ళతో మనసులను 

గిల్లే పరువాల ప్రాయం 

తుళ్ళింతల కెరటాలు పైకెగసి పడే సందేహాల సంద్రం 

గోదారొడ్డున ఇసుక తిన్నెల్లో దొరికే 

గువ్వరాళ్ళ గందరగోళం 

అన్నీ తమకే తెలుసనే నడమంత్రపు సిరుల సైన్యం

వెన్నెల లో మెరిసి 

పాలల్లో తడసి 

మిణుగురులై ఎగసి 

చినుకులలో వెలిసి 

తేనెల్లో విరిసి 

తొలిపొద్దున కురిసే

మంచుబిందువులై నునులేత సూర్య కిరణాలకే

కరిగి నీరయిపోయి 

పదహారేళ్ళ ప్రాయం

నాకు బాపు గారు ఆటో గ్రాఫ్ ఇచ్చారోచ్

నేనంటే నీకెందుకు ?

అందమయిన ప్రకృతి నీలో కలిసి ముందుకు సాగి పోతుంటుంది 

వసంతాల చివురులు తొడిగి మరి మరి మారాకులు వేస్తుంటుంది 

సువాసనల రాదారిలో ప్రతి పువ్వు పులకింతల నవ్వు రువ్వుతుంది 

చినుకుల కిత కితలకి మట్టి వయ్యారాల మొలకలు పొడుస్తుంటుంది

నీ చూపు తగిలినంత మేరా ఆకాశం వేవేల చుక్కల తివాచీ విప్పుకుంటుంది 

నీ స్పందన కి పులకించిన సెలయేరు గల గలా జల జలా నవ్వుతూ కింది కి జారిపోతుంది 

ఓ కను సైగ కి  నీ వెచ్చటి స్పర్శకి సైతం నోచుకోని 

నా కన్ను ఉప్పునీటి ఏరై ఆగకుండా ఉప్పొంగుతుంది 

భగ భగ మని గుండె లావాలా గుబులవుతుంది 

నా ఒక్కదాని కోసం చిమ్మ చీకటి పరదాలు పరుస్తుంది 

నేను మాత్రం మంచులా బిగిసి ,

 కరిగి నీరై , ఆవిరై సమసిపోతాను